Lafzon ke Dhaage

‘चीख’

Aaj phir koi mujhe chhoo ke nikal gaya.

Chal rahi thi sadak pe. Akele

Bas yahi gunaah tha.

Gunaah mera tha, vo bas chhoo ke nikal gaya.

Kyunki ye khel hai

Ye khel hai aur main khilona.

Khilona kyunki aurat hoon.

“Abla Naari.”

Durga, Saraswati, Lakshmi to bas mandir mein hain

Jo saamne chal rahi hai vo abla naari.

Arey O Kaayar! Zameer ke saudaagar.

Bech khaayi tune apni izzatt. Uski nahin, teri garima aaj sharmsaar hai.

Maa to kya hi bolegi

Teri aatma ko bhi aaj tujhpe dhikkar hai.

Cheekhti hai tujhpe

Janam dene waali khokh bhi,

Ki manushya ke bhes mein ‘bhediya‘ jana hai

Sammaan na kar saka uss shakti ka,

Kaayaron ki bheed mein naya naam judda hai.

Par sun le tu, ‘Aadami‘.

Uth khadi hojaungi yun,

Tu palat ke hass bhi na paaega

Bhare bazaar mein Kaali ke darshan karaungi yun

Kyunki tu kaayar hai. Aur bhaagega.

Par kabtak?

Jab cheekh ke cheeregi na vo ek aawaaz tujhe,

Nazarein khud se kabhi na mila paaega tu.

“Usko na sikhana ki samaaj mein kaise chalna hai, kyunki vo ladki hai.

Bete ko batana ki maryaada mein kaise rehna hai, kyunki zaroorat hai.”


‘Kabhi Socha Hai’

Kabhi socha hai ki kya hai iss soch ke pare

Jo ashkqon ko bhi aansun de jaati hai

Haarna chhahte nahin tum, magar zindagi maat khaati hai

Kabhi socha hai ki kya hai iss soch ke pare.

Kitne sapne hain, kitni ummeedein

Kitne fasaane, vo aashiyaane

Jo banaye nahin abhi tak, par sapnon mein bharpoor hain

Mitti ke khilonon se kaanch ke dilon tak

Cheer jaati hai, phir aati hai,

Baar baar aati hai, soch hai.

Jo vaade hain vo poore honge

Magar vahi jo khud se kiye hain

Duniya ka dastoor hai mitra,

Dhokon mein sukoon hai.

Tumhe dard hai, par unhe sukoon hai.

Kyunki aasaan hai todd dena,

modd dena, chhodd dena, bhool jaana,

hamesha ke liye.

To tum bhi bhoolo iss soch ko,

Jo haraati hai tumhe,

Bhagaati hai tumhe tumhi se.

Dekho unn rangeen pardon ke peechhe kitni muskaanein,

Tumhe jhaank rahi hain,

Maang rahi hain tumhara aagman.

Unhe niraash na karna,

Khud ko hataash na karna

Logon ki baatein unki apni

Tum iss soch ko panaah na dena

Aaegi, chali jaaegi. Soch hai.

Par, Kabhi Socha Hai?…


 

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s